ચૂંટેલા શેર ~ સુધીર દવે (ડલાસ) ~ આગામી કાવ્યસંગ્રહમાંથી: “ઉડાન કવિતાના ગગનમાં”

હા, અમે જુદા છીએ એ સત્ય તો સમજાય છે
એક પણ સળિયો નથી  ને કેદ અહી વરતાય છે
*
ભલે ધરતીના કંપોથી ઘણા બદલાય છે નક્શા
હૃદયના કંપથી જગમાં પરિવર્તન થશે સાચું
*
જ્યાં મળ્યો ના કોઈ બીજાનો ખભો
ત્યાં સુધીર જાતે સહારો થઈ ગયો
*
સાવ સુક્કું છે ઝરણ પાણી નથી
વારતામાં એક પણ રાણી નથી
*
તથ્ય શોધું સ્ક્રીન પર હું ક્યારનો
વેબ ઝૂરે વાયરસના ત્રાસમાં
*
રાહ જોઈને તરસ છેલ્લે બધું સમજી શકી
વાદળો દેખાય પણ વરસ્યા વગર વિખરાય છે
*
ગમે છે લાલ, પીળા ને ઘણા રંગો
પણ પડછાયો હવે કાળો નથી ગમતો
*
આપણી વચ્ચે ઘણું અંતર છે એની જાણ છે
તે છતાં વચ્ચે જ મળવા, હું હવે તૈયાર છું
*
સંભળાય છે જે દૂર દૂર ક્ષિતિજોના અંતમાં
શ્રી કૃષ્ણની એ વાંસળીનો નાદ થઈને રહે
*
સાંભળે સૌ માનવી જો એકબીજાની કથા
ભીંત હો ચારે તરફ પણ દ્વાર ત્યાં સાબિત થશે
*
છે ગણિત કળિયુગનું ‘મૉડર્ન ગ્લોબલ’ પ્રેમનું
થાય સરવાળો પછી ત્યાં બાદબાકી હોય છે
*
સત્યના આરાધકોનું નૂર કંઈ ઓછું નથી
એમના તો શ્વાસ મંત્રોચ્ચાર ત્યાં સાબિત થશે
*
પર્વતોને બીક લાગે ખીણના સાન્નિધ્યની
એ વ્યથા પૂરી સમજવા ઢાળ થઈ જાતે જુઓ
*
મિત્રો! મને આજે અહીં સાચું કશું મળતું નથી
મળશે જીવનમાં સામટું જ્યારે શરણ મળશે મને
*
એ જ આદમ, એ જ ઈવ, ફીક્કું સફરજન ખાય છે
મન વિવશ થઈ જાય છે, જૂના પ્રણયને પામવા
*
છે સભામાં લાખ, પણ ત્યાં એક વ્યક્તિ ખાસ છે
એ નજર શરમાઈને મલકાય તો હું શું કરું?
*
મહેલોની માયામાં એકલતા થાકી
લઉં છું સૂના આંગણિયે હું શ્વાસો
*
ચિત્ત જો ચકરાય તો તારો જ વિશ્વામિત્ર છું
મેનકાનું લઈ સ્વરૂપ વિહ્થવળ બનીને આવજે
*
કહી ના શકે માછલીને કશું પણ
સમસ્યા સ્વયંની ચગળતો કિનારો
*
એની પ્રતીક્ષાએ મને વ્યાકુળ કર્યો હોય છે
ખાલી રહે છે ઘર છતાં દરબાર ભર્યો હોય છે

~ સુધીર દવે (ડલાસ)
~ આગામી કાવ્યસંગ્રહમાંથી:
“ઉડાન કવિતાના ગગનમાં”
sudhirminadave@gmail.com