ચૂંટેલા શેર ~ એની તૈયારી નથી (ગઝલસંગ્રહ) ~ ગુણવંત ઠક્કર ‘ધીરજ’ (સુરત)

ચૂંટેલા શેર

ના તો તલવાર ના તો ઢાલ હવે
એ જ કરવી છે બસ કમાલ હવે
*
જિંદગી દરિયો નથી કે રણ નથી
તોય એને પાર કરવાનો જ છું
*
વાતેવાતે ઈશ્વરનો વાંક કાઢતા પહેલાં
એય જો, કે તારી પણ પાત્રતા અધૂરી છે
*
કોઈ કેળવણીથી જેને કેળવી હું ના શક્યો
એ સમજને ઠોકરોથી મારે કેળવવી પડી
*
એક પછી એક દલીલોના હાથે ચડી
સાવ નાની હતી વાત, ચોળાઈ ગઈ
*
પરપોટા વિના કંઈ જ નીકળતું નથી બીજું
કંઈકેટલાં જન્મોથી વલોવાઈ રહ્યો છું
*
જે રીતે ચાલે છે એ રીતે બધું ચાલ્યું તો
માણસાઈ સમું બચવાનું શું છે માણસમાં?
*
પ્રવેશીએ; અને જો ફાવે નહીં તો નીકળી જઈએ
સંબંધોને બજારો સમજી વ્યાપારી નથી કરવી
*
વિચારવું ન હતું પણ વિચારવું જ પડ્યું
‘કોઈ શું ધારશે’ એ મારે ધારવું જ પડ્યું
*
અહીં તો પડતાં આખડતાં બધું જાતે જ શીખવાનું
અનુભવની નિશાળોમાં કોઈ માસ્તર નથી હોતા
*
વગર વિચાર્યે અમલમાં મૂક્યા તો સમજાયું
ઘણા વિચાર મગજમાં વગર વિચાર્યા છે
*
આ ધર્મ શું? અધર્મ શું? આ સત્ય શું? અસત્ય શું?
ફરીફરી રચાય છે નવાંનવાં આ તથ્ય શું?
*
રોજ લાફિંગ ક્લબમાં એને એટલે જવું પડે
હસતાં હસતાં જીવવાની એની તૈયારી નથી
*
મૌન રહી શબ્દોનો હું માલિક થયો છું જ્યારથી
કંઠમાં એના ફૂંફાડા રોજ વધતા જાય છે
*
આ જન્મમાં મનપ્રદેશે જે અજાણ્યા રહી ગયા
એ સંબંધો પાછલા જન્મોથી ઓળખવા પડ્યા
*
મેં જ ઈચ્છાને મારી નાખી છે
તોય ખૂનીમાં મારું નામ નથી
*
માત્ર વળતર પર હતી દ્રષ્ટિ અમારી એટલે
ના અમે પહોંચી શક્યા અહીં આપણા કલ્ચર સુધી

~ ગુણવંત ઠક્કર ‘ધીરજ’
   +91 98255 67575
~ ગઝલસંગ્રહ:  એની તૈયારી નથી