ને પાણીપુરી ખાવી છે (ગઝલ) ~ જગન્નાથ રાજગુરુ ‘ઈશાન’

(નેવુંના દસકમાં રચાયેલી ગઝલ)
સિનેમાનો ચાળો છે ને ડંડો પોલીસવાળો છે ને માણસ જેવી ગાળો છે ને પાણીપુરી ખાવી છે
ઘરમાં ‘હું’ ભમરાળો છે ને સુવાવડનો વારો છે ને સીઝનમાં શિયાળો છે ને પાણીપુરી ખાવી છે

મત દેવાનું ટાણું છે ને દસ રૂપિયાનું નાણું છે ને આગળ પાછળ ડંડા છે ને પાણીપુરી ખાવી છે
અંગૂઠો તો આળો છે ને પેટ નીચે હોબાળો છે ને ગાયું માટે ફાળો છે ને પાણીપુરી ખાવી છે

જીવતર ખાલી બોટલ છે ને સામે ચાની હોટલ છે ને ચાલીશ પૈસા ટોટલ છે ને મુઠ્ઠીવાળી ખિસ્સામાં
મા ને બૈરું માંદા છે ને બાળકને બહુ ચાંદાં છે ને શ્વાસ હજુ સુંવાળો છે ને પાણીપુરી ખાવી છે

રામકથાનું છાપું છે ને જૂહુ પર તો ‘બાપુ’ છે ને બાપુ મોતી વેરે છે ને કાળાં ચશ્માં પહેરે છે
કલમનો કંટાળો છે ને મોટર જેવી ફાળો છે ને આંખોનો સરવાળો છે ને પાણીપુરી ખાવી છે

પગની નીચે રસ્તો છે માથા ઉપર તડકો છે ને કાંટાની જંજાળ્યું નોંધી ટાવર સામે ઊભો છે
ટેક્સીમાં ફાંદાળો છે ને રંગ કાચનો કાળો છે હવે, એ છે ને ઢેખાળો છે, ને પાણીપુરી ખાવી છે

~ જગન્નાથ રાજગુરુ ‘ઈશાન’ (મહુવા)