દિવાળીઃ કાવ્ય કોડિયાં ~ દેવિકા ધ્રુવ
(૧) દીપ જલે.. દેવિકા ધ્રુવ
દીપ જલે જો ભીતર સાજન, રોજ દિવાળી આંગન.
કાચું કોડિયું વાત આ જાણે, પરમ પુનિત ને પાવન.
મન-બરતનને માંજી દઈએ,
દર્પણ સમ દિલભાવન.
પછી ખીલે જો ભીતર સાજન,
રોજ દિવાળી આંગન……..દીપ જલે
નાની અમથી સમજી લઈએ,
ક્ષણની આવનજાવન.
આસોની અજવાળી અમાસે,
ઝગમગ દીપ સુહાવન……દીપ જલે.
ૐ કારના ગીતો ધરીએ,
સૂરીલી વાગે ઝાલર.
અખંડ જ્યોતે ઝળહળ સૌને
વંદન સહ અભિનંદન..અભિનંદન……દીપ જલે
(૨) નવી દિવાળી… દેવિકા ધ્રુવ
કોઈ નવી નવરાત્રી લાવો, એક નવી દિવાળી લાવો,
શેરીએ થાતી ગરબાઓની ત્રણ રૂપાળી તાળી લાવો.
આદર કેરા દાંડિયા ઝાલી અમૃત–રાસ રચાવો.
સ્નેહનું ઘૂંઘર, સ્મિતનું ઝુમ્મર, ઘમ્મર ઘૂમ મચાવો..
દિલડે દીવડા પ્રગટે એવી રાત અજવાળી લાવો… એક નવી દિવાળી લાવો..
પ્રાંતપ્રાંત કે ભાષા–ભેદની વાડો તોડી,વછોડી
માનવતાનો ધર્મ છે સાચો, ધનની પૂજા છોડી
મન–મંદિર સજાવો, કોઈ રીત મતવાલી મનાવો….એક નવી દિવાળી લાવો.
ઉરને આંગણ સમજણ કેરા સાથિયાઓ પૂરાવો.
એકાંત કુંજે, પ્રસન્ન ચિત્તે, આતમ–રાજ બોલાવો.
ચૌદશ કાળી હોય જો અંતર, વળીને વાળી આવો.. એક નવી દિવાળી લાવો..
નૂતન વર્ષે આશાઓના અભિગમ સંગે ઝુલો,
હો વિચાર–વાણી વર્તન સાચાં આચરણનાં ફૂલો,
ભીતર કંકુ પૂજાપાની આરત–થાળી લાવો … એક નવી દિવાળી લાવો..
મુક્તકઃ નવા વર્ષની શહનાઈ
નવા આ વર્ષની ગૂંજી રહી, શહેનાઇઓ ચોપાસ.
હવાની લ્હેરખી લઈ આવતી, આશાભર્યો અહેસાસ.
ને શબ્દોને ફૂટી કૂણી કૂણી, કૂંપળ નવી લીલી,
રહે તન–મન તણી શાંતિ, સદાયે આપને આવાસ.
—–દેવિકા ધ્રુવ
અપ્રતિમ કાવ્ય કોડિયાં 👌🏻👌🏻 દિવાળી ઝળાંહળાં!
Khub sundar . નવી દિવાળી.🪔
દીપ જલે જો ભીતર સાજન, રોજ દિવાળી આંગન.
કાચું કોડિયું વાત આ જાણે, પરમ પુનિત ને પાવન. સરસ રચનાઓ.
શુભ મંગલ.
સરયૂ પરીખ