ચૂંટેલા શેર ~ કમલેશ શુક્લ (સુરત) ~ ગઝલસંગ્રહઃ નભે આજ સૂરજ અસરદાર લાગે

અધૂરાં હતાં તે થયાં કામ પૂરાં
નિરંતર પ્રભુનો એ સહકાર લાગે
*
કરી વાત છાની, મળ્યાં ચોરપગલે
છતાંયે બધાને ખબર થઈ ગઈ છે
*
હોય કોઈ પણ સવાલો જિંદગીની દોડમાં
એક ચપટીમાં જવાબો આપવાનું યાદ છે
*
જો ગયો એ બાળવાને હાથ પણ દાઝી ગયો
આગ ચાંપી ભાગવાની વાત એ ભારે પડી
*
જાણું છું દરિયો તોફાની
તોયે નાવ તરાવી બેઠા
*
સંત સામે બેસવાથી શું થશે?
સાંભળીને ચાલવાથી છે કથા
*
પાક સારો આવશે તો ગોળધાણા રાખશું
દીકરી પરણાવવાની કામના છે કેટલી!
*
સમયને જતાં અહીં ઘણી વાર લાગે
રહી એક ક્ષણ પણ વજનદાર લાગે
*
સાવ પાસે આવીને એ હાથ હાથોમાં ધરે
પ્રેમ નામે ગ્રંથ આખો ત્યાં લખાતો હોય છે
*
કહે ઈશ્વર નથી ક્યાંયે, પુરાવા એ ઘણા માંગે
મળી ક્ષણ એક એવી તો ગયા માથું નમાવીને
*
આઘાં રહીને પ્રેમ, નહીં પાલવે હવે
અમને હતી એ જાણ, તમને ખબર હતી?
*
સ્વપ્નમાં રોજ આગમન તારું
નીંદ સાથે કરાર મારો છે
*
કહ્યું’તું એક જોષીએ બધું સારું નસીબે છે
તમે આવી મળ્યા તો વાત એ સમજાય છે આખી
*
જરાય એવું બન્યું નથી કે
પ્રયાસ સીધો સફળ થયો છે
પડીપડીને ઊભા થયા તો
કરી જે કોશિશ બધી ફળી છે
*
અમે ચાલી જશું તોયે તમારા દિલથી ક્યાં જાશું?
અમારી હાજરી વર્તાય, તો રડતા નહીં રાતે
*
વહે ફોરમ બધે એની, ‘મા’ સુંદર ફૂલ જેવી છે
રહી હાજર બધે ખૂણે, સરસ એ ઘર સજાવે છે
*
જરાયે ભાર ભણતરનો હતો ના બાળપણ આખું
અમે શીખ્યાં બધું રમતાં, સમય કેવો હતો પ્યારો
*
ચાદર પણ સંકેલી જાતે
રોયા થોડા મનની અંદર
*
થશે જો એક બારી બંધ, બીજી ખોલવી પડશે
જરા અજવાસ મેળવવા ઉપાયો શોધવા પડશે
*
જિંદગી આખી નમીને ચાલતાં ફાવ્યું નથી
હાથ જોડી એટલે તો મેં કશું માગ્યું નથી
*
આમ તું ક્યાં જાય છે ઓ રાહબર?
અંત તક કરવી પડે સાથે સફર
*
નવા રંગે, નવા રૂપે, ફરી પાછા છે ફરવાનું
બધું છોડી સહજ ચાલ્યા, હવે આ ભવ થશે પૂરો

~ કમલેશ શુક્લ (સુરત)
~ ગઝલસંગ્રહઃ નભે આજ સૂરજ અસરદાર લાગે
~ સંપર્કઃ +91 98241 01208

~ સાયુજ્ય પ્રકાશન
+91 99980 03128
+91 96012 57543