ચૂંટેલા શેર ~ રઈશ મનીઆર ~ ગઝલસંગ્રહ: કેવળ સફરમાં છું

જે ભીડમાં જીવે છે,
જરા એના હાલ જો
લાચારી આટલી કોઈ
તન્હાઈમાં નથી
*
બોર કેવાં હોય છે, શબરીને પૂછો
રામને પૂછો તો એ મીઠાં જ કહેશે
*
સાચી મજા સફરની મળી એ ઘડી મને
જ્યારે ગતિનું કોઈ પ્રયોજન રહ્યું નહીં
*
જન્મવેળા તેં રુદન દઈ
મોકલ્યો’તો, હે પ્રભુ!
એક-બે મહિના રહીને
સ્મિત હું જાતે શીખ્યો
*
જોર કરશો નહીં હલેસાં પર
બસ, લહાવો લો નાવ સરવાનો
*
બાળક પડીને જ્યારે ઊભા થવાનું શીખે
જે હો સહાય કરવા તત્પર, બહુ નડે છે
*
ઈશ્વરે પાઠવ્યો નહીં ઉત્તર
શક્ય છે પત્ર ત્યાં ગયો જ ન હો!
*
અંતે એના નામથી નક્શા બન્યા છે
ખેપ જેણે આદરી નક્શા વગરની
*
ન હાંફે તો બીજું કરે જિંદગી શું?
પગથિયાં ઘણાં એકસાથે ચડી છે
*
એ પૂછે છે પગનાં છાલાંનો મીનિંગ
પુત્ર જે રખડે પિતાની કાર લઈ!
*
જે બીજાનું વિચારતા જ નથી
અમને એના વિચાર આવે છે
*
સાંભળવો હોય તારે
અગર સત્યનો અવાજ
તાળી-તમાશા…
ઢોલ-નગારાથી સાવધાન
*
દુનિયાય તોલતી રહી પોતાનાં કાટલે
મારોય ત્રાજવામાં સમય થઈ ગયો પસાર
*
વિશ્વાસ કરીએ ત્યારે
ડુબાડે છે માણસો
માણસનો ડર જો રાખીએ,
જીવી શકાય નહીં
*
તળેટીમાં રહી મન ઝંખતું’તું
ટોચને હરદમ
જઈ ટોચે તળેટીને હવે
એ રમ્યતર સમજે
*
રાતે વંચાયું નહીં, દિવસે એ દેખાયું નહીં
નામ તારું કોતર્ય઼ું’તું રાતભર ઝાકળ ઉપર
*
મનગમતો અંશ વર્ણવી
રસપ્રદ બની ગઈ
પાત્રોનું પૂરું દર્દ
કથાને ખબર નથી
*
ધનને માટે એક વંશજ કાફી છે
ભાષા માટે લાખ વારસ જોઈએ
*
ગયા દિવસો, સતત
આ જાતને પુરવાર કરવાના
હવે બાકીના જીવનને
અમે તહેવાર કરવાના
*
મારી છે કમી, ખૂબી રહી જાય છે ઓઝલ
તારો છે કસબ, તારી ખતા શોભી ઊઠે છે
*
યુગ દૂરતાનો છે ને નિકટતાની ચાહના
બસ યાદ કરવું એ જ અડકવું બની ગયું
*
જ્યાં લગ એ બધા ઘાવને
તિલક ન કરી દે
શબ્દોને હું ચંદનનો
દરજ્જો નહીં આપું
*
જો ફરિયાદ કીધી અમે દૃશ્યો સામે
તબીબે અમારી જ દૃષ્ટિ તપાસી
*
કેવી મળી સવારી, કે અશ્વ લાકડાનો!
શું એને વેગ આપો! ને શું લગામ આપો!
*
મારી ગઝલો મારી એકલતા નથી
હું ભરીને બેઠો છું મારી સભા

~ રઈશ મનીઆર
~ ગઝલસંગ્રહઃ કેવળ સફરમાં છું
~ પ્રકાશકઃ Zen Opus, અમદાવાદ
~ www.zenopus.in
Link to Buy Online:
https://www.zenopus.in/book/ghazalpoetrygeet/keval-safar-ma-chhun