પાંચ ગઝલ ~ રાજેશ હિંગુ (મુંબઈ) ~ વતન: વાંસોજ ગામ ~ વ્યવસાય: લેડીઝ ટેઈલર

ટૂંક પરિચય: 
રાજેશ લક્ષ્મીચંદભાઈ હિંગુ
વતન: દીવની સરહદ પરનું વાંસોજ ગામ. હાલ થાણા (મહારાષ્ટ્ર)
વ્યવસાય: લેડીઝ ટેઈલર
અભ્યાસ:  બી.એ.
૨૦૧૮ થી ગઝલલેખનમાં પગરણ

(પાંચ ગઝલ)

૧. મેં કર્યું છે

પ્રથમ તો ગહન અધ્યયન મેં કર્યું છે,
એ બાદ જ તમારું ચયન મેં કર્યું છે.

પ્રણય-આભમાં ઉડ્ડયન મેં કર્યું છે,
પછી ક્યાં નિરાંતે શયન મેં કર્યું છે !

પ્રણય પાઠ ભણવા હવે સજ્જ છે એ,
હૃદયનું જુઓ ઉપનયન મેં કર્યું છે.

નથી રહી ઝરૂખેથી જોવાની નિસ્બત,
નયનમાં જ તારું અયન* મેં કર્યું છે.

ઝુકાવી દીધી જાત તારા ચરણમાં,
સ્વયંનું ખરું ઉન્નયન* મેં કર્યું છે.

*અયન = ઘર
*ઉન્નયન = ઉન્નતીકરણ

૨. દ્વિભાષી ગઝલ

ભીતર ગુંજે નાદ शिवोहम्।
તેથી લાગે अखिलं मधुरम्।

એ કાયમ સાથે ના રહેશે,
सर्वम् दुःखं सर्वम् क्षणिकम्।

ગુર્જરી ગળથૂથીમાં પીધી,
દ્વિજ થયો पीत्वा संस्कृतम्।

મિત્રો, મહેફિલ, ચાની ચુસ્કી,
એ જ ખરું છે मम ऐश्वर्यम्।

હું ક્યાંથી કંઈ નવતર લાવું?
છે व्यासोच्छिष्टं जगत्सर्वम्।

૩. પારિવારિક ગઝલ

મોભે છો ને દેશી નળિયાં
મારા ઘરનાં મોટાં ફળિયાં.

માથે બાનો હાથ ફર્યો છે;
તોડી નાંખ્યાં સૌ માદળિયાં.

અમને પગભર કરવા માટે;
બાપુ ઘસતાં પગનાં તળિયાં.

જ્યારે લથડું, ઝાલી લે છે;
ભઇલાનાં તો બાહુ બળિયાં.

ઘાવ મને લાગે ને આવે;
બેનીની આંખે ઝળઝળિયાં

ખોળે લઈ દાદાજી કહેતા
આપ જ મારા છો શામળિયા.

દાદીની વાર્તાથી ઘરમાં,
સંસ્કારોનાં દીપ ઝળહળિયાં

૪. એ ગયાં છે

મારી બધી નસોમાં વ્યાપીને એ ગયાં છે.
કેવું મજાનું સ્થાનક સ્થાપીને એ ગયાં છે!

કેવી રીતે કહું કે શ્રાપીને એ ગયાં છે!
શાશ્વત પીડા સ્મરણની આપીને એ ગયાં છે.

આખી સફરમાં સાથે ચાલ્યા નહીં તો શું ગમ!
સંગાથે થોડું અંતર કાપીને એ ગયાં છે.

છે ખાતરી કે ચૂસકી ભૂલી નહીં શકે એ,
મીઠી કડક પ્રણયની ચા પીને એ ગયાં છે.

કેવી રીતે ઉતારું હું ઋણ એમનું આ?
મહોબતની મોંઘી મિલકત આપીને એ ગયાં છે.

૫. જીવન મજાનું લાગશે

છે પ્રસાદી ઈશની, જો માનશે;
તો પછી જીવન મજાનું લાગશે.

તું મને મંઝિલ વિશે પૂછીશ નહિ;
તું મને લઇ જાજે જ્યાં પણ તું જશે.

બંધ કરી દે તું હવે એલાર્મ સૌ;
જાગતો સૂતો છે એ, ના જાગશે.

લ્યો અમે તો મુક્ત થઇ ગ્યા નાહીને;
આ નદી ન્હાવા બિચારી ક્યાં જશે?

રાહ ના જોજે હવે દીપક તણી;
દીકરી દિવડી છે, કુળ દીપાવશે.

બે ઘડી સાથે કદી બેઠાં નથી,
એય મારા બેસણામાં આવશે.

આમ તો તારી ગઝલમાં દમ નથી;
તેં લખી છે ‘મોજ’થી તો ચાલશે.

~ રાજેશ હિંગુ
+91 98676 52042